Qurban Qurbanov: “İnamsız meydana çıxsaq, uğur qazana bilmərik”.
90plus.az xəbər verir ki, “Qarabağ”ın baş məşqçisi Qurban Qurbanov Çempionlar Liqasının 2-ci turunda “Kopenhagen” üzərində qazanılan 2:0 hesablı qələbədən sonra mətbuat konfransında jurnalistlərin suallarını cavablandırıb. Təcrübəli mütəxəssis həm oyun, həm də komandanın gələcək hədəfləri barədə danışıb.
“Futbolçularım meydanda bir ailə kimi idilər”
Qurbanov öncə futbolçularını və azarkeşləri təbrik edərək qələbəni birlik nümunəsi kimi dəyərləndirdi:
“Bu gün sanki futbolçular və azarkeşlər meydanda birlikdə idilər. Şükür Allaha, belə gözəl qələbə əldə olundu. Rəqib ‘Kopenhagen’ olsa da, futbolçularım çəkinmədən, çox ciddi mübarizə apardılar. Belə böyük turnirlərdə elə an olur ki, ona dözmək lazım gəlir. Bunu ikinci hissə etdik. Rəqib dəyişikliklərlə daha çox riskə getdi. Bəzi top itkilərimiz oldu. Xüsusilə ikinci hissədə səbr və dözümlə oyuna davam etdilər.
“Həmişə inamım olub, amma 6 xalı gözləmirdim”
Jurnalistlərin “iki oyundan sonra maksimum xal qazanmağa inanırdınızmı?” sualına Qurbanov belə cavab verdi:
“Bəlkə çoxları buna inanmırdı, amma məndə inam həmişə olub. Keçən il yaxşı oyunlarımız vardı, sadəcə nəticələr alınmadı. Bu mövsüm isə inamımızı qoruyaraq daha yaxşı nəticə əldə etdik. Amma bəzən deyirlər ki, hər şeyə real baxmaq lazımdır. Düzdür. Ancaq meydana inamsız çıxsaq...Uduza bilərik. Uduzduğumuz oyunlarımız olub, amma hamı mübarizəmizdən razı qalıb. Bəlkə 6 xal gözləməzdim, amma inanırdım. 6 xal bəlkə gözləmirdim, amma inanırdım ki, uğur gələcək.”
“Azərbaycanın ‘Qarabağ’ı olmaq möhtəşəmdir”
Baş məşqçi klubun uğurlarının ölkə üçün böyük dəyər daşıdığını vurğuladı:
“Biz Azərbaycanın ‘Qarabağ’ıyıq. Liderlər arasında olmaq möhtəşəmdir. Prezidentin təbriki də məsuliyyətimizi artırır. Daha da çox işləməliyik. Bizə rahat olmaq yoxdur. Daha da inanaraq, güvənərək, çalışıb irəli getməliyik.
“Türkiyədən dəstək almaq böyük dayaqdır”
Türkiyə mətbuatının “Qarabağ”a diqqətini yüksək qiymətləndirən Qurbanov dedi:
“Türkiyədə bizi nəhəng klublara nümunə göstərirlərsə, bu, böyük sevincdir. Amma uğurun uğursuzluğu da var, buna da hazır olmalıyıq. Oyundan əvvəl də "Qalatasaray"ı təbrik etmişdim. İndi də təbrik edirəm. Həmişə Türkiyə klublarının hər birinə azarkeşlik edirik, onlara uğurlar arzu edirəm.
“Əsas hədəf – komandanı sağlam qoruyub saxlamaq”
Qurbanov uzun illərdir komandanın sükanı arxasında olduğunu və əsas məqsədinin “Qarabağ”ın davamlılığını təmin etmək olduğunu vurğuladı:
“Bu ad məni heç vaxt yorulmağa qoymayıb. Futbolçularımdan hər zaman əsgərlər kimi mübarizə aparmağı tələb etmişəm. Əsas hədəfim inamı və mübarizəni qoruyub-saxlamaqdır. Uğur özü gələcək.
"Qarabağ" mənim üçün nə deməkdir. Məşqçi kimi daha ciddi olmağımda, formalaşmağımda bu komanda mənim üçün əsas silah olub. Ola bilərdi ki, başqa klubda olum, uğurlu nəticələrim olsun. Amma orada bu qədər ciddi ola bilməzdim. Hardasa yorulardım. Amma bu komandada bu ad məni nə yorulmağa qoydu, nə də inamsız, məsuliyyətsiz olmağa. Əsas hədəf bu komandanı sağlam qoruyub-saxlamaq idi. Bilirdim ki, uğur gələcək. Bu komandada həmişə futbolçularımdan əsgərlər kimi vuruşmağı tələb etmişəm. Demişəm ki, bizim şəhidlərimiz, zabit və əsgərlərimiz ölüm, güllə qarşısında olublar. Biz meydanda 90 dəqiqə oynayırıq, daha sonra istirahət edirik. Bu, mənim hədəfim idi. Şükürlər olsun ki, çox nadir hallarda yorğun olduğunda nəsə edə bilməyiblər. Amma mənim hədəfim o olub ki, bu inamı, mübarizəni qoruyub-saxlayaq. Uğur gələcək. Futbol elə oyundur ki, mümkün deyil ki, hər il daha yaxşı, eyni nəticə olsun. Böyük klublar da bu il çempion olurlarsa, gələn il ola bilmirlər. Hamı inkişaf edir, hamı yenilik axtarır. Transferlərdə də bəzən az transfer edirik, bəzən futbolçunu çox araşdırırq. Qarşılığını Allah verəcək.
Elvin Cəfərquliyevin oyunun ən yaxşısı seçilməsindən
“Əlbəttə ki, buna sevinirəm. İlk olaraq, komandamın oyunçusunun seçilməsi. İkinci də, azərbaycanlının seçilməsi. Elvin heç də rahat futbolçu deyil. Bəzən formasından düşüb, sonra qalxıb.Elvində bir az stabillik çatışmır. Ancaq son matçlarda bir az özü də ciddiləşib, bəlkə mən onunla daha ciddi rəftar edirəm. Hamımız ehtiyatlı olmalıyıq. İstənilən an öz bacarığından aşağı çıxış edə bilər. Bəlkə ona bir neçə il lazımdır ki, məsuliyyəti dərk etsin, daha ciddi və böyük olmaq üçün. Amma bir neçə ili gözləyəsi olsaq, işimiz yaxşı olmaz. Çalışırıq ki, hər şeyi əldə saxlayaq. Elvinin potensialı bu deyil. Daha ciddi olsa, futbol haqda çox fikirləşsə, potensialı bundan daha çoxdur".
“Hamı mübarizəyə haqqını verdi”
UEFA-nın seçdiyi ən yaxşı futbolçular barədə danışan Qurbanov belə dedi:
“Mənim üçün hər bir futbolçu bu oyunda layiqli çıxış etdi. Əgər seçim məndə olsaydı, bütün komanda ən yaxşı seçilərdi.”
Avropanın böyük klublarından təklif olarsa...
"Azərbaycanın ən yaxşı məşqçisi olmaq məsələsinə tələsməyək. Təkliflər haqda ümumiyyətlə, düşünmürəm. Çünki belə hallarda daha da sadə olmağa çalışmalıyıq. Bu komandada stabilliyin çox vacib olduğunu dedim. Ağlımda belə fikir olsa, bu komandanın inamı da, uğuru da, sistemi də pozulacaq. Özümdən razılıq olardı ki, deyim Avropadan mənə təklif olmalıdır, filan. Bu haqda düşünmürəm. Hələ Azərbaycandayıq, yaxşı olar".
“Yanvardan sonra da ÇL-də olacağıq – çünki oyunlarımız var”
Komandanın qrupdan çıxmaq şansları ilə bağlı sualı isə baş məşqçi zarafatla cavablandırdı:
“Yanvardan sonra da bizi Çempionlar Liqasında görəcəksiniz, çünki oyunlarımız var (gülür). Əlbəttə, rəqiblər daha ciddi hazırlaşacaq, buna görə daha çox işləməli və cəsarətli olmalıyıq.”
Portuqaliyalı məşqçi Joze Mourinyonun "Benfika" "Çelsi"yə uduzanda "problem "Çelsi"yə uduzmaq yox, "Qarabağ"a uduzmaqdır" deməsinə cavab vermək istəyərdiniz?
“Yox, o Mourinyodur, dahi məşqçilərdən biridir. Ona nə sual, nə də cavab verə bilərəm.”
