“Mançester Siti”nin baş məşqçisi Pep Qvardiola argentinalı hücumçu Xulian Alvaresin klubdan ayrılmasına münasibət bildirib.

90plus.az xəbər verir ki, İspan mütəxəssis Alvaresin “Atletiko Madrid”dəki parlaq çıxışını yüksək qiymətləndirib və onun qərarını anlayışla qarşıladığını deyib.

“Bəlkə də onu saxlamaq istərdim… amma niyə getdiyini başa düşürəm”, – deyə Qvardiola oktyabrın 18-də “Everton”la qarşılaşma öncəsi keçirdiyi mətbuat konfransında bildirib.

Xulian Alvares 2024-cü ildə “Mançester Siti”ni tərk edərək, “Atletiko Madrid”ə keçmişdi. Argentinalı futbolçu bu mövsüm La Liqada ən məhsuldar hücumçulardan biri kimi çıxış edir və Dieqo Simeonenin rəhbərliyi altında əsas heyətin daimi üzvünə çevrilib.

“Xulian Alvares əla oyunçudur. İndi o, dünyanın ən yaxşı klublarından biri olan “Atleti”də çıxış edir, dünya səviyyəli məşqçi və futbolçularla birlikdə oynayır, mükəmməl performans göstərir”, – deyə Qvardiola əlavə edib.

Alvares “Mançester Siti”də keçirdiyi iki il ərzində bütün əsas titulları – o cümlədən 2023-cü ildəki “trebl”i – qazanmış, lakin əsasən Erlinq Haalandın kölgəsində qalmışdı. Məhz daim əsas heyətdə oynamaq istəyi onu “Atletiko Madrid”ə aparmışdı.

Qvardiola onun gedişinə təəssüflə yanaşsa da, Alvaresin bu qərarının düzgün olduğunu etiraf edib.