“Barselona”nın ulduz futbolçusu Rafinhanın “Qızıl top” mükafatında 5-ci yeri tutması həm oyunçunun özü, həm də ailəsi üçün sürpriz olub.
90plus.az xəbər verir ki, 28 yaşlı braziliyalı ulduz tədbirə həyat yoldaşı Nataliya Belloi və oğlu ilə birlikdə qatılıb.
Rafinhanın həyat yoldaşı tədbirdən sonra “Instagram” hesabında paylaşım edərək ərinin mövsüm ərzindəki çıxışını yüksək qiymətləndirib:
“Küçələr bu mövsümü heç vaxt unutmayacaq! 61 qol və asist! Sən möhtəşəmsən!”
Rafinha geridə qalan mövsümdə “Barselona”nın hücum xəttində aparıcı rol oynamışdı. O, həm La Liqada, həm də Çempionlar Liqasında həlledici qollar vuraraq komandasının uğurlarına töhfə verib. Mövsümü ümumilikdə 38 qol və 23 assistlə tamamlayan oyunçu statistik cəhətdən əla göstəricilərə imza atsa da, “Qızıl top” səsverməsində ilk üçlüyə daxil ola bilməyib.
Səsvermənin qalibi PSJ-nin hücumçusu Usman Dembele olub, ikinci yeri isə gənc istedad Lamin Yamal tutub.
