İspaniya nəhəngi "Real Madrid" 2026-cı ilin yay transfer pəncərəsi üçün əsas prioritetini yarımmüdafiə xəttinin gücləndirilməsinə yönəldib. Madrid klubunun siyahısında ilk sırada isə "İnter"in və İtaliya millisinin aparıcı simalarından olan Nikolo Barella yer alır.

90plus.az xəbər verir ki, "Real Madrid"in rəhbərliyi 29 yaşlı futbolçunu komandanın “yeni mühərriki” kimi görür. Lakin bu transferin qarşısındakı ən böyük maneə Barellanın "İnter"lə 2029-cu ilə qədər qüvvədə olan uzunmüddətli müqaviləsidir.

Məlumatda bildirilir ki, Milan təmsilçisi normal şərtlərdə italiyalı yarımmüdafiəçini “toxunulmaz” oyunçu hesab edir. Ancaq klubun bu mövsüm UEFA Çempionlar Liqası ilə erkən vidalaşması maliyyə balansına təsir göstərib. Avropa gəlirlərindən məhrum qalan "İnter"in 80 milyon avro civarında təklifi rədd etməsinin çətin olacağı və danışıqlara açıq ola biləcəyi iddia olunur.

"Real Madrid"in isə bu məbləği ödəməyə hazır olduğu vurğulanır. Madridlilər həm dinamika qatacaq, həm də təcrübəsi ilə oyunu idarə edə biləcək profil axtarır. Barella yüksək qaçış göstəriciləri və meydanın hər iki istiqamətində effektiv oyunu ilə seçilir.

Bu mövsüm "İnter"in heyətində 32 oyuna çıxan italiyalı futbolçu 1 qol və 6 məhsuldar ötürmə ilə yadda qalıb və komandasının oyun quruculuğunda əsas fiqurlardan biri olub.

Beləliklə, qarşıdakı yay transfer dönəmində "Real Madrid"in Barella üçün “rəddedilməz təklif”lə çıxış edib-etməyəcəyi futbol ictimaiyyətinin diqqət mərkəzində olacaq.