İspaniyanın “Real Madrid” klubunda vəziyyətin gərginləşdiyi bildirilir.

90plus.az xəbər verir ki, komandanın ulduz futbolçusu Kilian Mbappenin diz zədəsindən sonra klubun tibbi heyətini “yanlış diaqnoz və müalicə”də ittiham etdiyi iddia olunur.

Səs-küylü iddia

Cadena SER radiosunun yaydığı məlumata görə, fransalı hücumçu dizindəki problemin böyüməsinə və sağalma prosesinin uzanmasına görə əsas məsuliyyəti “Real Madrid”in tibbi heyətində görür. Məlumatda qeyd edilir ki, klub rəhbərliyi də zədənin düzgün qiymətləndirilmədiyini və nəticədə uyğun müalicə planının tətbiq olunmadığını düşünür.

İddialara əsasən, hadisədə sabiq futbolçu və məşqçi Alvaro Arbeloa ilə yanaşı, Mbappenin özü də müəyyən dərəcədə məsuliyyət daşıyır. Bildirilir ki, futbolçu xüsusilə dekabr ayında Cristiano Ronaldoya məxsus bir təqvim ili ərzində vurulan qol rekorduna çatmaq üçün özünü həddindən artıq yükləyib. Mövsüm ərzində bir neçə dəfə fiziki limitlərini aşaraq meydana çıxması da zədənin ağırlaşmasına səbəb kimi göstərilir.

Mövsüm göstəriciləri

2025/26 mövsümündə “Real Madrid” forması ilə bütün turnirlərdə 33 oyuna çıxan Kilian Mbappe 38 qol və 6 məhsuldar ötürmə ilə diqqətçəkən performans sərgiləyib.

Hazırda klub daxilində vəziyyətin necə inkişaf edəcəyi və tərəflər arasında rəsmi açıqlamanın verilib-verilməyəcəyi maraqla gözlənilir.