Robbi Kin: “Qarabağ artıq qalib gəldiyini düşünür, amma futbolda hər şey mümkündür”.
90plus.az xəbər verir ki, “Ferensvaroş”un baş məşqçisi Robbi Kin UEFA Çempionlar Liqasının pley-off mərhələsində “Qarabağ”la keçirilən ilk oyunu (1:3) şərh edib.
Matçdan sonra mətbuat konfransında çıxış edən irlandiyalı mütəxəssis ilk hissədəki oyundan razı qaldığını bildirib:
“İlk hissə yaxşı keçdi, düzgün oynadıq, qol vurduq. Özümüzə inamımız yüksək idi. Amma Bence Etvoşun zədələnməsi bizi geri saldı. Ondan sonra orta sahəyə nəzarət etməkdə çətinlik çəkdik. İkinci hissədə isə rəqib bizi tamamilə əzmədi. İki qolu standart vəziyyətdən buraxdıq və bu, məyusedicidir. Epizodları onlar dəyərləndirdi, biz isə yox”.
Kin gələn həftə Bakıda keçiriləcək cavab görüşünə də toxunub:
“Bizim motivasiyamız odur ki, rəqib artıq qalib gəldiyini düşünür. Amma futbolda hər şey mümkündür. Bu vəziyyətdən çıxmaq üçün şansımız var”.
O, zədələnərək meydanı tərk edən Bence Etvoşun durumuna da aydınlıq gətirib:
“Daha dəqiq məlumat önümüzdəki günlərdə məlum olacaq. Amma bir futbolçu bu cür oyunu yarımçıq buraxırsa, bu, heç vaxt yaxşı əlamət deyil”.
Qeyd: “Qarabağ” – “Ferensvaroş” cavab matçı avqustun 27-də Bakıda keçiriləcək.
