Braziliyalı futbol əfsanəsi Ronaldinyo gənc ulduz Lamin Yamal haqqında fikirlərini bölüşüb.

90plus.az xəbər verir ki, o, “Barselona”nın və İspaniya millisinin gənc hücumçusuna xüsusi mesaj göndərib.

Ronaldinyo bildirib ki, komandanın “10” nömrəsini daşımaq təkcə sözlərlə yox, meydanda göstərilən ustalıq və intizamla dəyər qazanır. Onun sözlərinə görə, Yamal dünya futbolunun arzuladığı potensiala sahibdir və buna görə də danışmaq yox, bacarığını göstərmək daha vacibdir.

Əfsanəvi oyunçu vurğulayıb ki, Lionel Messi və Andres İnyesta kimi futbolçular sükutla tarix yazıblar. Ronaldinyo Yamalı da həmin yolu seçməyə səsləyib və El Klasikonun qışqırıqla yox, meydandakı ustalıqla qazanıldığını qeyd edib.

O, gənc futbolçuya növbəti reaksiyasını oyundakı performansı ilə verməyi məsləhət görərək yaratdığı fürsətləri sənətkarlıqla dəyərləndirməsini istəyib. Ronaldinyoya görə, istedad böyük məsuliyyət tələb edir və Yamal bu yükün öhdəsindən gələ biləcək futbolçulardandır.