"Əl-Nəsr" klubunda çıxış edən Kriştiano Ronaldo sosial şəbəkədə paylaşdığı mesajla mümkün ayrılığa işarə edib.

90plus.az xəbər verir ki, 40 yaşlı hücumçu bunları bildirib:

“Bu fəsil bitdi. Hekayə isə hələ yazılır.”

Portuqaliyalı ulduzun Səudiyyə Ərəbistanı təmsilçisi ilə müqaviləsi 30 iyun tarixində başa çatır və onun gələcək karyerası ilə bağlı söz-söhbətlər artmaqda davam edir.

Maraqlı bir jest isə NBA superulduzu və "Neşvil SC" klubunun ortağı olan Yannis Adetokunbo (Giannis Antetokounmpo) tərəfindən gəlib. Məşhur basketbolçu Ronaldoya heyranlığını ifadə edərək onu futbolun "ən böyüyü" (“GOAT”) adlandırıb və aşağıdakı fikirləri səsləndirib:

“Gəl Yunanıstanda oyna. ‘Olimpiakos’, ‘Panatinaikos’, ‘AEK’ və ya ‘PAOK’. Mənə fərqi yoxdur – hansında istəsən!”

"Flamenqo" Ronaldonu transfer etmək istəməyib

Digər tərəfdən, bir neçə klub Ronaldonu transfer etmək fikrində olmadığını açıq şəkildə bildirib. "Flamenqo" klubunun idman direktoru Marsio Boto isə belə deyib:

“Ronaldo? Bizə cəmi bir ay oynayacaq futbolçu lazım deyil.”

Kriştiano Ronaldonun gələcək qərarı futbol ictimaiyyəti tərəfindən maraqla gözlənilir.