Alman futbolunun tanınmış simalarından biri olan Verner Lorant 76 yaşında vəfat edib.

90plus.az xəbər verir ki, onun vəfatı futbol dünyasında dərin kədər doğurub.

Lorant 1992–2001-ci illər arasında Almaniyanın "1860 Münhen" klubunu çalışdıraraq, komandanı 3-cü liqadan Bundesliqaya yüksəldib və Avropa yarışlarına qatılmasını təmin edib. O, həmçinin Türkiyədə "Fənərbağça", "Sivasspor", "Kayseri Ərciyesspor" və "Kasımpaşa" kimi klublarda da məşqçilik edib. Xüsusilə, 2002-ci ildə "Fənərbağça"nın "Qalatasaray"a qarşı 6:0 hesablı tarixi qələbəsində komandanın baş məşqçisi kimi yadda qalıb.

Futbolçu kimi də uğurlu bir karyeraya sahib olan Lorant "Ayntraxt Frankfurt" və "Rot-Vays Essen" kimi klublarda ümumilikdə 325 Bundesliqa oyununa çıxıb. O, "Frankfurt" ilə UEFA Kuboku və Almaniya Kubokunu qazanıb.

Lorant bir ildən artıq davam edən ağır xəstəlikdən sonra Bavyeriyada yerləşən Vasserburq xəstəxanasında vəfat edib. Onun itkisi ailəsi və futbolsevərlər üçün böyük bir itki kimi qiymətləndirilir.

"Fənərbağça" klubu Lorantın vəfatı ilə bağlı başsağlığı mesajı yayımlayaraq onun klub tarixindəki yerini və töhfələrini vurğulayıb.