PSV Salah-Eddineni transfer edə bilmədi – mərakeşli futbolçu Romaya qayıdır.

90plus.az xəbər verir ki,  Niderlandın PSV klubu Anass Salah-Eddineni heyətində saxlamaq planını reallaşdıra bilməyib.

Eyndhoven təmsilçisi mərakeşli müdafiəçinin transfer hüquqlarını almaq üçün müqavilədə nəzərdə tutulan 8 milyon avroluq satınalma bəndini aktivləşdirmək istəyib. Lakin futbolçunun menecmenti ilə aparılan danışıqlarda razılıq əldə olunmayıb.

Bunun nəticəsində sabah başa çatacaq opsion müddəti istifadə olunmadan qüvvədən düşəcək və PSV artıq transferi tamamlaya bilməyəcək.

22 yaşlı futbolçu indi gələcəyi ilə bağlı qərar vermək üçün variantlarını dəyərləndirəcək. Salah-Eddine icarə müddətinin başa çatmasının ardından yenidən “Roma”nın düşərgəsinə qayıdacaq.

Mənbənin məlumatına görə, müdafiəçiyə maraq göstərən klubların sayı kifayət qədər çoxdur. Buna onun uğurlu mövsüm keçirməsi səbəb olub. Salah-Eddine ötən mövsüm UEFA Çempionlar Liqasında debüt edib, həmçinin Mərakeş millisinin Dünya Çempionatı heyətinə dəvət alıb.

Beləliklə, PSV-nin futbolçunu birdəfəlik transfer etmək cəhdi uğursuzluqla nəticələnsə də, Anass Salah-Eddinenin karyerasını hansı klubda davam etdirəcəyi yaxın həftələrdə müəyyənləşəcək.