Şotlandiya Premyer Liqa təmsilçisi "Seltik" futbol klubu Qəzzada artmaqda olan humanitar böhran fonunda bölgəyə dəstək məqsədilə mühüm bir addım atıb.
90plus.az xəbər verir ki, klubun xeyriyyə fondu – "Seltik Futbol Klubu Fondu" Qəzzadakı təcili ərzaq ehtiyaclarını qarşılamaq üçün Birləşmiş Millətlər Təşkilatının Dünya Ərzaq Proqramına (WFP) 100 min funt sterlinq ianə etdiyini açıqlayıb.
Fondun rəsmi açıqlamasında bildirilir ki, bu vəsait dünyanın ən böyük humanitar yardım təşkilatlarından biri olan "WFP" vasitəsilə bölgəyə yönəldiləcək. Məqsəd Qəzzada aclıqla üz-üzə qalan on minlərlə insana təcili ərzaq yardımı çatdırmaqdır.
Açıqlamada həmçinin qeyd olunub ki, hazırda Qəzzada təxminən 640 min insan aclıq səviyyəsində yaşayır, 132 min uşaq isə kəskin qidalanma çatışmazlığı səbəbindən ölüm riski ilə üzləşib.
"Bu dəstək bizim klub dəyərlərimizin və sosial məsuliyyətimizin bir parçasıdır. Qəzzada baş verən insan faciəsinə biganə qala bilməzdik," – deyə fondun bəyanatında vurğulanıb.
Xatırlatma: "Seltik" klubu daha əvvəl də müxtəlif sosial və humanitar layihələrə dəstək verməklə tanınıb. Klubun bu addımı həm futbol ictimaiyyətində, həm də humanitar təşkilatlar arasında müsbət qarşılanıb.
