Surinam Futbol Federasiyasının (SVB) bank hesablarının məhkəmə qərarı ilə dondurulması ölkə millisinin 2026 Dünya Çempionatının seçmə mərhələlərindən uzaqlaşdırılması riskini gündəmə gətirib.
90plus.az xəbər verir ki, bu vəziyyət federasiya daxilində keçirilən son seçkilərin nəticələrindən narazı qalan Oldenstam və Kurban qruplarının açdığı məhkəmə iddiasından sonra yaranıb. Məhkəmənin verdiyi qərar Surinam Futbol Federasiyasının maliyyə fəaliyyətini faktiki olaraq iflic vəziyyətinə salıb və bu, milli komandanın dünya çempionatına gedən yolunu ciddi təhlükə altına alıb.
Hesabların dondurulması federasiyanın gündəlik əməliyyatları həyata keçirə bilməməsi, futbolçulara və məşqçilər korpusuna ödənişlərin gecikməsi, səfər və yaşayış xərclərinin qarşılanmaması deməkdir. Əgər bu durum FIFA və CONCACAF (Şimali, Mərkəzi Amerika və Karib Futbol Konfederasiyası) tərəfindən “hökumət müdaxiləsi” və ya “üçüncü tərəfin təsiri” kimi qiymətləndirilsə, “Surinam” millisi 2026 Dünya Çempionatının seçmə oyunlarından diskvalifikasiya oluna bilər.
Futbol ictimaiyyəti və idman qurumları SVB rəhbərliyini yaranmış hüquqi problemləri ən qısa zamanda həll etməyə və milli komandanın gələcəyini qorumağa çağırır. Surinam millisinin seçmə mərhələlərdəki taleyi yaxın günlərdə məhkəmənin verəcəyi qərarlardan və FIFA-nın atacağı mümkün addımlardan asılı olacaq.
