“Tottenhem” İngiltərə millisinin yarımmüdafiəçisi Konor Qallaherin transferi üçün “Atletiko Madrid”lə 35 milyon funt sterlinqlik razılaşmanı tamamlamağa yaxındır.
90plus.az xəbər verir ki, London klubu bu keçiddə “Aston Villa”nı geridə qoyub.
Qallaheri heyətinə qatmaq üçün favorit kimi “Aston Villa” göstərilirdi, lakin “Tottenhem”in “Atletiko Madrid”in tələb etdiyi məbləği ödəməyə hazır olduğunu bildirməsindən sonra “Spörs” 25 yaşlı futbolçunun transferini bitirməyə çox yaxındır.
“Villa” sabiq “Çelsi” futbolçusunu satınalma opsiyası ilə icarə əsasında heyətinə qatmaq istəyirdi. Qallaher hələlik “Tottenhem”lə şəxsi müqavilə şərtlərini razılaşdırmayıb, lakin bunun formal məsələ olduğu bildirilir.
Yarımmüdafiəçi çərşənbə axşamı gecə “Atletiko Madrid”in İspaniya Kral Kubokunda “Deportivo”ya qarşı oyunundan əvvəl transferin rəsmiləşməsini istəyir.
Qallaher Premyer Liqaya qayıdışın bu yay keçiriləcək Dünya Çempionatı ərəfəsində Tomas Tuxelin rəhbərliyi altındakı İngiltərə millisinin heyətinə yenidən düşmək şansını artıracağına ümid edir. O, alman mütəxəssisin rəhbərliyi altında indiyədək cəmi bir oyunda çıxış edib — Seneqala qarşı yoldaşlıq görüşündə 3:1 hesablı məğlubiyyətdə 59 dəqiqə meydanda olub.
“Tottenhem” yarımmüdafiə xəttini gücləndirməyə çalışır, çünki Rodriqo Bentankur ən azı üç ay müddətinə sıradan çıxıb. Uruqvaylı futbolçu ötən həftə Premyer Liqada “Bornmut”a qarşı məğlubiyyət zamanı aldığı zədədən sonra bud əzələsindən əməliyyat olunmalıdır.
