UEFA prezidenti Aleksander Çeferin komandaların sıx oyun qrafiki barədə fikirlərini bölüşüb.
90plus.az xəbər verir ki, o, həm klubların, həm də milli komandaların bu vəziyyətə uyğunlaşmalı olduğunu bildirib:
“Milli komandalar üçün beynəlxalq turnirlər keçirilməsə, yalnız 3 həftəlik yay fasiləsi qalacaq. Bəzi insanlar bizdən beynəlxalq oyunların sayını azaltmağımızı istəyir. Amma İngiltərədə iki ölkə kuboku var və onlar heç birindən imtina etməyə razı deyillər”, – deyə Çeferin qeyd edib.
UEFA rəhbəri əlavə edib ki, bəzi klublar və futbol assosiasiyaları əksinə, daha çox gəlir əldə etmək məqsədilə oyun sayının artırılmasının tərəfdarıdırlar:
“Bəziləri daha çox qazanc üçün daha çox qarşılaşmanın keçirilməsini istəyir. Biz isə burada “qızıl orta”nı tapmışıq və hər iki tərəfin maraqlarını nəzərə alaraq balans yaratmalıyıq.”
Xatırlatma: İngiltərə və İspaniyanın bir sıra aparıcı klublarının baş məşqçiləri, o cümlədən “Mançester Siti”nin çalışdırıcısı Xosep Qvardiola, oyun qrafikinin həddindən artıq sıx olmasından tez-tez narazılıq edirlər.
