Bir müddətdir cəzaya görə yaşıl meydanlardan uzaq qalan fransız futbolçu Pol Poqba karyerasına yenidən başlamağa hazırlaşır. Təcrübəli yarımmüdafiəçi ilə Fransa Liqa 1 təmsilçisi “Monako” maraqlanır.

90plus.az xəbər verir ki, “Yuventus”da çıxış etdiyi dövrdə qadağan olunmuş maddələrdən istifadə etdiyi üçün cəzalandırılan Poqba təxminən iki ildən sonra futbola dönüş etməyi planlaşdırır.

Tanınmış jurnalist Canluka Di Marzionun məlumatına görə, Poqba və “Monako” klubu arasında iki illik müqavilə ilə bağlı danışıqlar davam edir. Məlumata əsasən, tərəflər arasında müzakirələr müsbət istiqamətdə irəliləyir və Poqbanın yaxın günlərdə yeni komandası ilə müqavilə imzalayacağı gözlənilir.

Qeyd: Poqba karyerası ərzində “Mançester Yunayted” və “Yuventus” kimi nəhəng klublarda forma geyinib. O, ümumilikdə 446 oyunda iştirak edib, 76 dəfə rəqib qapılarına yol tapıb və 97 məhsuldar ötürmə ilə yadda qalıb.