“Ayntraxt” UEFA Çempionlar Liqasının Liqa mərhələsinin 7-ci turu çərçivəsində sabah Bakıda “Qarabağ”la qarşılaşacaq.

90plus.az xəbər verir ki, Frankfurt klubunun baş məşqçisi Dennis Şmitt oyunöncəsi təşkil olunan mətbuat konfransında iştirak edib. 32 yaşlı mütəxəssisin fikirlərini təqdim edirik:

“Dünən və bu gün vaxtımızdan maksimum istifadə edərək məhsuldar şəkildə çalışdıq. Futbolçular məşqlərdə çox yaxşı təsir bağışladılar və ümumi əhval-ruhiyyəm son dərəcə müsbətdir. İrəliləyiş hiss olunur, böyük addımlar atmışıq. Oyunçuların mənə olan etimadı açıq-aydın görünür. Artıq bütün fikrimiz Bakı səfərinə yönəlib. Dəyişə bilmədiyimiz məqamlar mövcuddur, amma meydanda necə oynayacağımız yalnız bizdən asılıdır. Aktiv və cəsarətli futbol sərgiləmək niyyətindəyik. Sabah qarşıdakı həftə baxımından bir növ final xarakteri daşıyan oyunu qazanmaq üçün çox yaxşı imkanımız var. Bu, unudulmaz bir an ola bilər və biz bunu səbirsizliklə gözləyirik. Rasmus Kristensen tez ruhdan düşən oyunçu deyil, o, oynamağa hazırdır və maska ilə meydana çıxacaq. Qapını isə Kaua Santos qoruyacaq.

13 il əvvəl Bakıda “Qarabağ”a qol vurmuş Aleks Meyerin məşqçilər heyətində yer alması da diqqətçəkən məqamdır. Daim çempionluq uğrunda mübarizə aparan, oyun sistemi oturuşmuş və birbaşa futbol oynayan bir komandaya qarşı çıxacağıq. Müdafiədə dərinliyi düzgün qorumaq, keçid epizodlarından səmərəli yararlanmaq və top bizdə olarkən keyfiyyətli oyun göstərmək vacib olacaq.”