Joao Kanselo “Barselona”ya qayıdışını reallaşdıracağına getdikcə daha çox inanır. Futbolçuya yaxın mənbələr bildirir ki, son inkişaflardan sonra o, bu transferin baş tutacağına əmindir.

90plus.az xəbər verir ki, hazırda “Əl-Hilal”da çıxış edən 31 yaşlı portuqaliyalı cinah müdafiəçisi, 2023/24 mövsümündəki uğurlu icarə dövründən sonra yenidən blauqrana formasını geyinməyi uzun müddətdir arzulayır. MD nəşrinin onun ətrafı ilə əlaqəsi zamanı bu sözlər təsdiqlənib: “O, ‘Barselona’ya qoşulacaq.”

Fabrizio Romanonun məlumatına görə, “Barselona” Kanselonun icarəyə götürülməsi üçün “Əl-Hilal”a ilk rəsmi təklifini göndərib. Bu da onu idman direktoru Dekonun yanvar planlarında ən real variant kimi önə çıxarır.

Klub əvvəlcə mərkəz müdafiəçisi transferinə üstünlük versə də, müdafiə xəttində yaşanan çatışmazlıqlar fonunda Kanselonun çoxfunksiyalı olması, sübut olunmuş keyfiyyəti və komandaya uyğunluğu dəyərli əlavə kimi qiymətləndirilir.

Kanselo transferin baş tutması üçün maaşının ciddi şəkildə azaldılmasına da razıdır. Onun “Əl-Hilal”ın baş məşqçisi Simone İnzaqi ilə uyğunluq problemi var və futbolçunun müqaviləsinin bitməsinə 6 ay qalıb.

Agent Jorje Mendeşin klub prezidenti Joan Laporta və Deko ilə yaxın münasibətləri də bu keçidin sürətlənməsində mühüm rol oynayır.