“Kəpəz”in yarımmüdafiəçisi Ehtiram Şahverdiyev Misli Premyer Liqasının 17-ci turunda “Qarabağ”a qarşı qazanılan 2:0 hesablı qələbə ilə bağlı fikirlərini bölüşüb.

90plus.az xəbər verir ki, futbolçu ilk olaraq azarkeşlərə müraciət edərək bu uğurun komanda üçün xüsusi əhəmiyyət daşıdığını bildirib. Onun sözlərinə görə, kollektiv uzun müddətdir belə bir nəticəyə ehtiyac duyurdu. Şahverdiyev rəqibin səviyyəsini də yüksək qiymətləndirib və “Qarabağ”ın Azərbaycan futbolunda həm taktiki, həm də texniki baxımdan oturuşmuş güclü komandalardan biri olduğunu vurğulayıb.

Buna baxmayaraq, “Kəpəz” futbolçusunun sözlərinə görə, komanda bu oyuna da digər qarşılaşmalar kimi məsuliyyətlə yanaşıb və əsas hədəf meydandan maksimum nəticə ilə ayrılmaq olub:

“Rəqibin kimliyindən asılı olmayaraq hər oyuna ciddi hazırlaşırıq. Bu matç da istisna olmadı. Hazırlığımız öz bəhrəsini verdi və sonda qalib gələn tərəf biz olduq. Bu qələbə bizi çox sevindirdi. Bizə inanıb dəstək olan bütün azarkeşlərə təşəkkür edirəm”.

Qeyd: Ehtiram Şahverdiyev görüşün 55-ci dəqiqəsində fərqlənərək “Kəpəz”in ikinci qoluna imza atıb.