Lionel Messi gələcək planlarından danışdı: “Məşqçi olmaq istəmirəm”.

90plus.az xəbər verir ki, Argentina millisinin kapitanı Lionel Messi ABŞ-da, Mayami şəhərində jurnalistlər Nikola Okkiato və Dieqo Leukoya müsahibə verib. Ulduz futbolçu karyerasını başa vurduqdan sonrakı planları ilə bağlı maraqlı açıqlamalar edib.

Messi bildirib ki, özünü gələcəkdə məşqçi kimi görmür:

“Açığı, özümü məşqçi rolunda təsəvvür etmirəm”.

Dünya çempionu futbolçu daha çox idarəçilik tərəfinə maraq göstərdiyini vurğulayıb:

“İdman direktoru olmaq ideyası mənə daha maraqlıdır. Amma əgər üç variantdan birini seçməli olsam, ən çox istədiyim klub sahibi olmaqdır”.

Messi əlavə edib ki, məqsədi sıfırdan bir layihə qurmaqdır:

"Öz klubumun olmasını istərdim. Bir klubu inkişaf etdirmək, aşağıdan başlamaq, uşaqlara və insanlara böyümək şansı vermək, sonda isə vacib və böyük bir klub qurmaq”

Qeyd: Lionel Messi hazırda MLS-də “İnter Mayami”nin formasını geyinir.