Luka Modriç Joze Mourinyonu “ən sərt məşqçi” adlandırdı: “Hətta Ronaldonu ağlatmışdı”.
90plus.az xəbər verir ki, “Real Madrid”in sabiq yarımmüdafiəçisi Luka Modriç İtaliya mediasına müsahibəsində karyerası ərzində çalışdığı məşqçilər arasında Joze Mourinyonu ən sərt mütəxəssis kimi xarakterizə edib. Xorvatiyalı futbolçu maraqlı bir detalı da açıqlayıb.
Hazırda "Milan"ın rənglərinə bürünən Modriçin sözlərinə görə, Mourinyo bir dəfə Kristiano Ronaldonu belə ağlada bilib:
“Mourinyo? Xüsusi biridir. Həm məşqçi, həm də insan kimi. Təəssüf ki, onunla cəmi bir mövsüm işləyə bildim”.
Təcrübəli yarımmüdafiəçi bildirib ki, portuqaliyalı mütəxəssisin sərtliyi hətta komandanın lider futbolçularına qarşı da dəyişmirdi:
“Onun Kriştianonu ağlatdığını gördüm. Meydanda hər şeyini verən bir futbolçunu, sadəcə bir epizodda rəqibin cinah müdafiəçisini təqib etmədiyinə görə sərt şəkildə tənqid etmişdi”.
Modriç Mourinyonun futbolçularla ünsiyyət tərzinə də toxunub:
“Mourinyo futbolçularla çox birbaşa danışır. Bəzən bu ağır görünə bilər, amma o, dürüstdür”.
Bu açıqlamalar Joze Mourinyonun niyə futbol dünyasında həm hörmət edilən, həm də qorxulan məşqçilərdən biri olduğunu bir daha göstərir.
