Qabonda milli komandaya tətbiq edilən sanksiyalar ləğv olundu.
90plus.az xəbər verir ki, Qabon hökuməti Afrika Millətlər Kubokunda uğursuz çıxış edən milli komandaya tətbiq etdiyi sanksiyaları ləğv edib. Ölkədə idman naziri vəzifəsində baş verən dəyişiklikdən sonra əvvəlki qərarlar qüvvədən düşüb.
Mərakeşin ev sahibliyi etdiyi Afrika Millətlər Kubokunda qrup mərhələsini sonuncu pillədə başa vuran Qabon yığmasının çıxışı ölkə rəhbərliyində ciddi narazılıq doğurmuşdu. Keçmiş idman naziri Semplis-Desire Mambula turnirdəki nəticələri “utancverici” adlandıraraq yanvarın 1-də milli komandanın fəaliyyətinin dayandırıldığını açıqlamışdı.
Həmin qərardan sonra baş məşqçi Tyerri Muyuma vəzifəsindən uzaqlaşdırılmış, komandanın aparıcı futbolçuları – Pyer-Emerik Obameyanq və Bruno Ekyole Manqa heyətdən kənarlaşdırılmışdı. Bu addımlar Qabon futbolunda böyük rezonans doğurmuşdu.
Lakin hökumətdəki kadr dəyişikliyindən sonra yeni idman naziri Pol Ulrix Kessani bütün sanksiyaların ləğv edildiyini rəsmən bəyan edib. Onun sözlərinə görə, milli komandanın fəaliyyəti bərpa olunacaq və futbolçularla bağlı qərarlara yenidən baxılacaq.
Qeyd: Bu qərar FIFA-nın hökumət müdaxiləsinə qarşı sərt mövqeyi fonunda Qabon Futbol Federasiyasının mümkün diskvalifikasiyasının da qarşısını alıb. Yeni mərhələdə Qabon futbolunda sabitliyin təmin olunması əsas hədəf kimi göstərilir.
