Beynəlxalq Futbol Assosiasiyaları Şurasının (IFAB) yanvarın 20-də Londonda keçiriləcək iclasında VAR (video köməkçi hakim) sistemi ilə bağlı mühüm və futbolun gedişinə ciddi təsir göstərə biləcək qayda dəyişikliklərinin müzakirə olunacağı bildirilib.

90plus.az xəbər verir ki, IFAB-ın İllik İşçi Toplantısında irəli sürüləcək təkliflər fevralın 28-də Uelsin Hensol şəhərində keçiriləcək İllik Baş Assambleyada səsə qoyularaq yekun qərar veriləcək.

IFAB-ın gündəmində VAR sistemi ilə bağlı 4 əsas dəyişiklik maddəsi yer alır.

1. Yanlış künc zərbələrinə VAR müdaxiləsi

Əgər top əslində qapıdan zərbə olduğu halda künc zərbəsi təyin edilibsə, VAR bu qərara müdaxilə edərək düzəliş edəcək. Lakin əks vəziyyətdə — yəni künc zərbəsi olmalı ikən aut verilibsə — VAR müdaxilə etməyəcək.

2. Səhv ikinci sarı vərəqəyə VAR müdaxiləsi

Hakimin açıq-aşkar səhv etdiyi ikinci sarı vərəqə hallarında VAR müdaxilə edə biləcək. Amma əgər hakim çox aydın olan ikinci sarı vərəqəlik epizodu görməzsə, VAR bu vəziyyətdə yenə də prosesə qoşulmayacaq.

3. Qapıdan zərbə və aut atışlarına 8 saniyə qaydası

Bu mövsümdən qapıçılara tətbiq olunan 8 saniyə qaydasının qapıdan zərbə və aut atışlarında da tətbiq olunması planlaşdırılır. Məqsəd oyunun tempini artırmaqdır.

4. Futbolçuların bəzək əşyalarından istifadəsi

Zədələnməyə səbəb olmayacaq şəkildə örtülməsi şərti ilə futbolçuların yenidən bəzək əşyalarından  istifadə etməsinə icazə verilməsi təklif olunur.