Vinisius Junior “Barselona”ya qarşı tarixi rekorda köklənib.
90plus.az xəbər verir ki, “Real Madrid”in braziliyalı ulduzu Vinisius Junior qarşıdakı İspaniya Superkuboku finalında “Barselona”ya qarşı həm qol həsrətinə son qoymaq, həm də klub tarixində yeni rekorda imza atmaq niyyətindədir.
Son 19 oyunda qol vura bilməyən Vinisius Junior bu mənfi seriyanı məhz final matçında qırmaq istəyir. Hücumçu üçün bu qarşılaşma təkcə titul baxımından deyil, şəxsi statistika baxımından da xüsusi əhəmiyyət daşıyır.
Məlumata görə, Vinisius Junior “Real Madrid” tarixində kubok finallarında ən çox qol töhfəsi verən futbolçu olmaq hədəfini qarşısına qoyub. Braziliyalı futbolçu indiyədək həlledici finallarda 15 qol və məhsuldar ötürmə ilə yadda qalıb və “kral klubu”nun ən kritik oyunlarında etibarlı fiqur olduğunu sübut edib.
Hazırda bu göstəricidə Vinisius Junior Kriştiano Ronaldo, Ferents Puşkaş və Karim Benzemadan cəmi 1 qol töhfəsi geri qalır. Həmin futbolçular “Real Madrid” tarixində kubok finallarında ən çox qol töhfəsi verən oyunçular kimi rekordun sahibləridir.
Əgər Vinisius Junior “Barselona”ya qarşı Superkubok finalında 2 qol töhfəsi (qol və ya assist) ilə fərqlənə bilsə, o zaman “Real Madrid” tarixində bu göstərici üzrə yeni rekorda imza atacaq və adını klubun qızıl səhifələrinə yazdıracaq.
