Türkiyəli mütəxəssis Volkan Dəmirəl “Azərtac” dövlət agentliyinə açıqlamasında “Qarabağ”ın çıxışlarını yaxından izlədiyini bildirib.

90plus.az xəbər verir ki, o, Ağdam təmsilçisinin son dövrlərdə uğurlu oyun nümayiş etdirdiyini qeyd edib: “Komandanın bir neçə futbolçusunu xüsusi diqqətlə izləyirəm və qarşıdakı qarşılaşmalarda onlara uğurlar arzulayıram. Qarşıda çətin oyunlar var, lakin heyətin potensialı kifayət qədər yüksəkdir və müsbət nəticələr gözləmək mümkündür”.

Volkan Dəmirəl Azərbaycan çempionunun heyətində bəyəndiyi oyunçulara da toxunub: “Kevin Medinanı xüsusilə qeyd edə bilərəm. Onu 2-3 il əvvəl izləmək imkanım olub və çox etibarlı müdafiəçi olduğunu görmüşəm. Nəriman Axundzadə isə son illərdə komandaya həm qolları, həm də həlledici nəticələri ilə böyük töhfə verib. Onun performansını yüksək dəyərləndirirəm. Bu futbolçular həm fərdi keyfiyyətləri, həm də komandanın uğuru baxımından vacib fiqurlardır”.

Qeyd: Volkan Dəmirəl Türkiyə millisində və “Fənərbağça” klubunda uğurlu karyerası ilə tanınıb. O, məşqçi kimi son olaraq “Gənclərbirliyi” klubunda fəaliyyət göstərib.