Avstriya klubu “Zalsburq” yarımmüdafiəçisi Maurits Kyerqor Bişoffu məşq zamanı baş verən intizam pozuntusuna görə mövsümün sonuna qədər komandadan uzaqlaşdırıb.

90plus.az xəbər verir ki, klub bu hadisəni futbolçunun son oyun heyətlərinə daxil edilməməsindən sonra təsdiqləyib.

Bişoff son dəfə mart ayının ortalarında “Rapid Vyana”ya qarşı keçirilən və 0:1 hesabı ilə uduzduqları ev oyununda meydana çıxıb.

Hadisədən sonra “Zalsburq” həm futbolçuya, həm də onun nümayəndələrinə bu mövsüm ərzində komanda məşqlərinə qayıtmayacağını bildirib. O, mövsümün qalan hissəsində fərdi şəkildə məşq edəcək.

Danimarkalı hücumameyilli yarımmüdafiəçi ötən yay “Bröndbü”dən “Zalsburq”a transfer olunsa da, əsas heyətdə daimi yer qazanmaqda çətinlik çəkib.

Ümumilikdə, Bişoff bütün turnirlərdə 24 oyuna çıxıb, 2 qol vurub və 5 məhsuldar ötürmə ilə yadda qalıb.