Türkiyəyə hamıdan əvvəl yollanan "Səbail" hazırlığını da erkən başa vuraraq vətənə qayıdır. Bayıl təmsilçisi bu gün Bakıya dönür.  90plus.az " Komanda.az "a istinadən xəbər verir ki, komandanın baş məşqçisi Şahin Diniyev açıqlamasında komandanın iki həftəlik hazırlığını dəyərləndirib: "Türkiyədəki hazırlığı yekunlaşdırdıq. Artıq Bakıya qayıdırıq. Məşqləri orada davam etdirəcəyik. 14 gün ərzində 20 məşq və 3 yoxlama oyunu keçirdik. Bu say komandanın necə yüklənməsini göstərir. Bizə lazım idi ki, funksional hazırlığı bərpa edək və fikrimcə, bunu yoluna qoyduq. Fiziki hazırlığı qaydasına salmaq baxımından məqsədimizə çatdıq. Futbolçularda özünəinamı qaytarmağa çalışdıq və buna da qismən nail olmuşuq. Bu uşaqlarda potensial böyükdür. İnanıram ki, bu komanda ilə istənilən nəticəni əldə edə biləcəyik. İki həftəlik hazırlıq dövründə taktiki məşqlər də oldu ki, oyunlarda bunu icra etməyə çalışdıq. Çoxlu rotasiyalar etdik. Hər mövqe üzrə axtarışda idik və ideal variant tapmaq istəyirdik. Fikrimcə, buna da nail olduq". Diniyev transfer fəaliyyəti barədə də danışıb. Təcrübəli mütəxəssis çox dəyişikliyə ehtiyac duymadıqlarını belə əsaslandırıb: "Onsuz da qış fasiləsində yaxşı futbolçu tapmaq olmur. Transfer xatirinə transfer etmək işimizə mane ola bilərdi. Çox oyunçu gətirib hamısını da oynadırsansa, belədə xətlərarası əlaqə pozulur. Anlaşmanı qaydaya salmaq üçün vaxt az idi. Ona görə cəmi bir legioner transferi ilə kifayətləndik. Boşluqları daxili qüvvə hesabına doldurmağa üstünlük verdik. Yeganə çox problemli mövqe yarımmüdafiənin cinahı idi ki, vinger funksiyasını David Qomisə etibar edəcəyik. Serbiya "Spartak"ı ilə oyunda 15-20 dəqiqə oynadı. Düzdür, onun hazırlığı hələ yerində deyil. Tam formaya düşməsinə bir qədər vaxt lazım olacaq. Bununla belə, "qabında olan" bizim fəlsəfəmizə çox yaxındır. İnanıram ki, onu komandaya götürməklə səhv etmədik. Təlim-məşq toplanışından istədiyimi aldım və əminəm ki, çempionatda daha yaxşı "Səbail" görə biləcəyik".