FIFA prezidenti Canni İnfantino 2026-cı il dünya çempionatının final oyunu ilə bağlı diqqətçəkən yeniliyi təsdiqləyib.

90plus.az xəbər verir ki, 2026 Dünya Çempionatının finalında tarixdə ilk dəfə olaraq “Super Bowl” üslubunda yarımfasilə şousu təşkil olunacaq. Bu, futbol dünyasında indiyədək görünməmiş bir yenilik hesab olunur.

Məlumata görə, şounun əsas siması məşhur musiqiçi Kris Martin olacaq. Layihənin hazırlanmasında onun qrupu “Coldplay” və beynəlxalq təşkilat “Global Citizen” iştirak edəcək.

Bu təşəbbüsün məqsədi dünya çempionatının finalını daha da möhtəşəm və qlobal auditoriya üçün cəlbedici etməkdir. ABŞ-da keçirilən “Super Bowl” yarımfasilə şoularının uğuru nəzərə alınaraq, FIFA da oxşar konsepti futbola tətbiq etməyə qərar verib.

Qeyd: Xəbər ilk olaraq BBC Sport tərəfindən yayılıb.

Yeni format futbol azarkeşləri arasında müxtəlif reaksiyalar doğurub. Bəziləri bunu şounun cazibəsini artıracaq addım kimi qiymətləndirsə də, digərləri futbolun ənənəvi ruhuna uyğun olmadığını düşünür.