"Qarabağ"dan Fransa "Dijon"unun futbolçusu Yassin Benzianı transfer etmək istədikləri barədə xəbərlərə münasibət bildirilib. Klubun mətbuat xidmətinin rəhbəri Gündüz Abbaszadə 90plus.az-a açıqlamasında Ağdam təmsilçisinin 29 yaşlı yarımmüdafiəçi ilə danışıqlar apardığını təsdiqləyib və onunla razılaşmağa yaxın olduqlarını bildirib: “Bəli, "Qarabağ"ın transfer etmək istədiyi futbolçuların siyahısında Yassin Benzia da var. Hazırda onunla danışıqlarımız davam edir. Benzia ilə danışıqların yekununa əsasən müqavilə imzalanacaq. Müqavilənin detalları barədə məlumat verə bilməyəcəyəm. Danışıqlar yekunlaşdıqdan sonra bütün detallara aydınlıq gələcək”. Əlavə edək ki, Yassin Benzia Fransada "Lion", "Lill", Yunanıstanda "Olimpiakos", Türkiyədə "Fənərbaxça" və "Hatayspor" kimi komandaların da formasını geyinib. Əlcəzair millisinin sabiq üzvü Fransanın aşağı yaş qruplarından ibarət yığmalarında da çıxış edib. Fransanı “L`equipe” nəşri “Qarabağ”ın Yassin Benzia ilə 2,5 illik müqavilə imzalaya biləcəyi barədə məlumat yayıb.