Türkiyənin Antalya şəhərində təlim-məşq toplanışında olan “Qəbələ” bu gün ikinci yoxlama oyununu keçirib. 90plus.az xəbər verir ki, “qırmızı-qaralar” növbəti sınaq matçında Almaniyanın “Lukenvalde” klubu ilə üz-üzə gəlib. “Limak Sports Senter”də keçirilən oyun “Qəbələ”nin 3:2 hesablı qələbəsi ilə yekunlaşıb. Matçda hesabı rəqib açıb. Almanlar 17-ci dəqiqə fərqləniblər. 30-cu dəqiqədə Gülağa Əsədov “Qəbələ”nin bərabərlik qoluna imza atıb. Ramon Maçado 57, Felipe Santos isə 70-ci dəqiqədə Azərbaycan təmsilçisinin üstünlüyünü möhkəmlədibsə, 72-ci dəqiqədə rəqib fərqi azaldıb. Bu, oyunda sonuncu qol olub. “Qəbələ” ikinci oyununda 3:2 hesablı qələbə qazanıb.