“Real Madrid” ulduzu Vinisius Junior Avropada klubsuz qala bilər – “Çelsi”nin mövqeyi bəlli oldu.
90plus.az xəbər verir ki, “Real Madrid”in braziliyalı hücumçusu Vinisius Junior ilə bağlı sensasion iddia ortaya atılıb. Fransalı jurnalist Romain Molina-nın yaydığı məlumata görə, futbolçunun agentləri Avropanın bir çox klubuna onu təklif etsə də, heç bir real maraq yoxdur.
Məlumata əsasən, 25 yaşlı vingerin nümayəndələri mümkün transfer üçün “bütün variantları” yoxlasa da, nəticə əldə olunmayıb. Hətta transfer bazarında aktivliyi ilə tanınan “Çelsi” belə hazırda bu keçiddə maraqlı deyil.
“Çelsi”nin əvvəlki planı dəyişdi
Daha əvvəl braziliyalı jurnalist Leonardo Bertozzi iddia etmişdi ki, London klubu Vinisius üçün 138 milyon funt-sterlinq dəyərində rekord təklif hazırlayır. Bu transfer baş tutsaydı, İngiltərə rekordunu yeniləyə bilərdi.
Lakin son məlumatlara görə, “Çelsi” artıq bu transfer variantını gündəmindən çıxarıb və yay pəncərəsində futbolçunu heyətinə qatmaq niyyətində deyil.
“Real Madrid” satış variantını nəzərdən keçirir
Vinisiusun “Real Madrid”lə müqaviləsi 2027-ci ilin yayına qədər qüvvədədir. Buna baxmayaraq, klub rəhbərliyinin onun gələcəyi ilə bağlı qeyri-müəyyənlik səbəbindən satış ehtimalını nəzərdən keçirdiyi bildirilir. Xüsusilə də oyunçu yeni müqavilə imzalamaqda tərəddüd etsə, “kral klubu”nun onu pulsuz itirmək istəmədiyi vurğulanır.
Hazırkı vəziyyətə görə isə Vinisius Junior üçün Avropa nəhənglərindən konkret təklifin olmaması diqqət çəkir və bu, yay transfer bazarında ən çox müzakirə olunan mövzulardan birinə çevrilib.
