İkinci hissədə oyunumuzu düzəltdik. Təəssüf ki, bunu lazımi nəticəyə çevirə bilmədik. Heç-heçə ədalətli nəticədir”. 90plus.az xəbər verir ki, bu sözləri “Zirə”nin baş məşqçisi Rəşad Sadıqov Misli Premyer Liqasının 10-cu turunda “Kəpəz”lə oyundan (0:0) sonra deyib.  O, komandasının hücumları məntiqi sonluğa çatdıra bilməməsini futbolçuların keyfiyyəti ilə əlaqələndirib: “Heyətimizdə yaradıcı futbolçu qıtlığı var. Digər komandalara baxırıq, heç nədən qol yaradırlar. Ümumən futbolçuların çıxışından razıyıq. 20 xal toplamışıq. Sadəcə olaraq oyun baxımından daha yaxşısını istəyirəm”. Mütəxəssis zirvədə qalmağın çətinliyi barədə bunları söyləyib: “Təbii ki, çətin olacaq. Bu gün ilk hissədən narazı idim. Amma ikinci hissədə yaxşı oynadıq. Çempionat çətin keçir. Kim daha istəkli olacaqsa, o da üstünlük qazanacaq. Nəsə proqnoz vermək çətindir. Bəzi mövqelərdə usta futbolçuya ehtiyacımız var”. O qeyd edib ki, “Qarabağ”la eyni xala malik olmaları üzərlərində təzyiq yaratmır: "Qarabağ"ın xal toplaması bizdə basqı yarada bilməz. Onların gücünə hamımız bələdik. Bütün matçlar ağır keçir. Oyunları təhıil edəndə əmin olmursan ki, hansısa rəqib üzərində dominantlıq edəsən. Hamı böyük çətinliklə qələbə qazanır. Bu, futbolumuz üçün yaxşıdır. Uzun illərdir ki, çempionatda rəqabətin olmasını istəyiridik. Bu mövsüm bunu görürük. Bizi çox maraqlı mövsüm görünür”. R.Sadıqov qeyd edib ki, adının milli komanda ilə yanaşı hallanması “Zirə”dəki işinə mənfi təsir etmir: “Uzun illərdir futbol ictimaiyyəti millidə yerli məşqçinin çalışmasını istəyir. Mən də yerli məşqçilərdənəm. Adımın hallanması normaldır. Bu gün bütün varlığımla "Zirə"nin uğurları üçün çalışıram. Bu dəqiqə bütün işim "Zirə" ilə bağlıdır. Ehtimalla bağlı suallara cavab verməyi düzgün hesab etmirəm”. O, həm “Zirə”də, həm də millidə çalışmaq barədə sualı belə cavablandırıb: “İki yerdə işləməyi Azərbaycanda yalnız Qurban Qurbanov bacara bilər. Mən və digər məşqçilər üçün çox çətin olar”.