2025-ci ildə Təl-Əvivdə keçirilməsi nəzərdə tutulan idman gimnastikası üzrə Avropa çempionatının ev sahibliyi İsraildən alınıb. 90plus.az xəbər verir ki, Avropa Gimnastika İttifaqının rəsmi saytı bu məlumatı verib. Avropa Gimnastika İcraiyyə Komitəsi İsraildəki mövcud vəziyyətlə əlaqədar yarışın başqa ölkəyə keçirilməsinə qərar verib. İttifaq yarışa ev sahibliyi etmək üçün ölkələrin müraciətlərinə yenidən baxacaq. Dövlətlər təklifini aprelin 23-dək təqdim edilə bilər. Qeyd : 2023-cü il oktyabrın 7-də Qəzza zolağından HƏMAS silahlılarının İsrail ərazisinə hücum etməsindən sonra Yaxın Şərqdə vəziyyət kəskin şəkildə pisləşib və bu, sərhədyanı yaşayış məntəqələrinin sakinlərinin öldürülməsi və 200-dən çox İsrail vətəndaşının girov götürülməsi ilə müşayiət olunub. İsrail tərəfi buna cavab olaraq bu günə qədər davam edən “Dəmir Qılınclar” əməliyyatının başlandığını elan edib.