Neymar Braziliya millisinin baş məşqçisi Karlo Ançelotti bu yay keçiriləcək Dünya Çempionatı üçün 26 nəfərlik heyətə daxil edilib.

90plus.az xəbər verir ki, 34 yaşlı futbolçu hazırda Braziliyanın “Santos” klubunda çıxış edir və 128 oyunda 79 qolla ölkə tarixinin ən çox qol vuran oyunçusudur. O, 2023-cü ildən bəri zədələrlə bağlı problemlərə görə “Seleçao”da çıxış etmirdi.

Bu çağırış onun dördüncü Dünya Çempionatında iştirak edəcəyi deməkdir. O, əvvəl 2014, 2018 və 2022 turnirlərində də Braziliya üçün oynamışdı.

66 yaşlı italiyalı Ançelotti heyəti Rio-de-Janeyroda keçirilən mərasimdə açıqlayıb və Neymarın adı elan olunanda azarkeşlər böyük sevinc göstəriblər.

Ançelotti bildirib:
“Biz bütün il boyu Neymarı analiz etdik.”
“Biz gördük ki, son dövrdə o, davamlı oynayıb və fiziki baxımdan yaxşı vəziyyətdədir.”

Alisson Bekker zədə səbəbilə “Liverpul”un son 10 oyununu buraxmasına baxmayaraq heyətə salınıb. Eyni zamanda “Mançester Yunayted”dən Kazemiro və Mateuş Kunya, “Nyukasl”dan Bruno Gimaraeş, “Arsenal”dan Qabriel, “Brentford”dan İqor Tiaqo və “Bornmut”dan Rayan da heyətdə yer alıb.

Lakin “Çelsi”nin hücumçusu Joao Pedro bu mövsüm Premyer Liqada 15 qol və 5 assistlə klubun ən məhsuldar futbolçusu olmasına baxmayaraq kənarda qalıb.

Heyətdə həmçinin La Liqa ulduzları Vinisius Junior (“Real Madrid”) və “Barselona”dan Rafinya, eləcə də 19 yaşlı hücumçu Endrik (hazırda “Lion”da icarədə, “Real Madrid”ə məxsusdur) yer alıb.

Beşqat dünya çempionu Braziliya qrup mərhələsində 13 iyunda Mərakeşlə, 20 iyunda Haiti ilə və dörd gün sonra Şotlandiya ilə qarşılaşacaq.

Genişləndirilmiş 48 komandalı Dünya Çempionatı 11 iyunda ABŞ, Kanada və Meksikada start götürəcək.

Braziliya Dünya Çempionatı heyəti:

Qapıçılar: Alisson (“Liverpul”), Ederson (“Fənərbağça”), Veverton (“Qremio”).
Müdafiəçilər: Alexəks Sandro, Danilo, Leo Pereira (“Flamenqo”), Bremer (“Yuventus”), Ibanez (“Əl-Əhli”), Uesli (“Roma”), Markinyos (“Paris Sen-Jermen”), Qabriel (“Arsenal”), Duqlas Santos (“Zenit Sankt-Peterburq”).
Yarımmüdafiəçilər: Bruno Gimaraeş (“Nyukasl”), Kazemiro (“Mançester Yunayted”), Danilo Santos (“Botafogo”), Fabinyo (“Əl-İttihad”), Lukas Paketa (“Flamenqo”).
Hücumçular: Endrik (“Lion”), Qabriel Martinelli (“Arsenal”), İqor Tiaqo (“Brentford”), Mateuş Kunya (“Mançester Yunayted”), Rafinya (“Barselona”), Vinisius Junior (“Real Madrid”), Luiz Enrike (“Zenit Sankt-Peterburq”), Neymar (“Santos”), Rayan (“Bornmut”).