Taylandın paytaxtı Banqkokda keçirilən 2025 FIVB Qadınlar arasında Dünya Voleybol Çempionatının final qarşılaşmasında Türkiyə millisi ilə İtaliya millisi üz-üzə gəlib.
90plus.az xəbər verir ki, gərgin mübarizəyə səhnə olan qarşılaşmanın taleyi tay-brek setində həll olunub. Oyunu 3:2 hesabı ilə qalib başa vuran İtaliya dünya çempionu olub.
Final qarşılaşması yerli vaxtla saat 15:30-da Banqkokdakı Huamark İdman Salonunda baş tutub. Beş setlik qarşılaşmada hər iki komanda yüksək səviyyəli oyun nümayiş etdirib. Türkiyə millisi tarixində ilk dəfə çıxış etdiyi dünya çempionatının finalında gümüş medala sahib olaraq tarixi bir uğura imza atıb.
Türkiyə qazandığı setləri üstün oyunla və açıq fərqlə (25:13 və 25:19) başa vurub. İtaliya isə 1-ci, 3-cü və 5-ci setlərdə daha stabil oyun sərgiləyərək dar fərqlərlə üstün olub. Həlledici 5-ci setdə Türkiyə yığmasının etdiyi bir neçə vacib səhv oyunun axarını dəyişib.
Türkiyə 2 – 3 İtaliya
1-ci set: 23–25
2-ci set: 25–13
3-cü set: 24–26
4-cü set: 25–19
5-ci set: 8–15
Bu nəticə ilə Türkiyə qadın voleybol millisi tarixində ilk dəfə dünya çempionatının finalına yüksəlib və gümüş medal qazanaraq dünya səviyyəsində ciddi uğura imza atıb.
