İbrahima Konate “Liverpul”dan ayrılır – yeni müqavilə danışıqları nəticəsiz qaldı.
90plus.az xəbər verir ki, “Liverpul”un müdafiəçisi İbrahima Konate klubdan ayrılmağa hazırlaşır.
Bir neçə mənbənin yaydığı məlumata görə, fransalı mərkəz müdafiəçisi ilə yeni müqavilə ilə bağlı aparılan danışıqlar uğursuzluqla nəticələnib. Tərəflər maaş məsələsində ortaq məxrəcə gələ bilmədiyindən Konate cari müqaviləsinin müddəti başa çatdıqdan sonra – iyunun sonunda “Liverpul”u azad agent kimi tərk edəcək.
Məlumata əsasən, klub rəhbərliyi futbolçunu komandada saxlamaq istəsə də, onun maliyyə tələblərini qarşılamağı məqsədəuyğun hesab etməyib. Danışıqların hələ 2023-cü ilin noyabrında başladığı və son iki il yarım ərzində davam etdiyi bildirilir. “Liverpul” müdafiəçiyə ciddi maaş artımı təklif etsə də, razılıq əldə olunmayıb.
Beləliklə, Konate bu yay komandadan ayrılan növbəti tanınmış futbolçu olacaq. Daha əvvəl Məhəmməd Salah və Endryu Robertsonun da “Enfild”lə vidalaşacağı barədə məlumatlar yayılmışdı.
“Liverpul” artıq müdafiə xəttində mümkün boşluğu doldurmaq üçün addımlar atıb. Klub yanvarda razılaşdırılmış transfer əsasında yayda “Renn”dən Ceremi Jakeni heyətə qatacaq. Bundan əlavə, ötən il transfer edilən italiyalı Covanni Leoni də komandadadır, lakin o, debüt matçında ağır diz zədəsi almışdı.
2021-ci ildə “Leypsiq”dən 36 milyon funt-sterlinq qarşılığında transfer olunan Konate “Liverpul”un heyətində 183 oyuna çıxıb. O, xüsusilə son iki mövsümdə əsas heyətin vacib üzvlərindən biri olub. Müdafiəçi 2024/25 mövsümündə Premyer Liqada 36, bir əvvəlki mövsümdə isə 30 matça start heyətində başlayıb.
“Liverpul” rəhbərliyi kapitan Vircil van Deyk, Co Qomez və gənc müdafiəçilərə güvənərək Konatenin ayrılığından sonra da müdafiə xəttində keyfiyyəti qoruyacağına inanır.
