23 yaşadək futbolçulardan ibarət Argentina yığmasının baş məşqçisi Xavyer Maskerano Paris-2024 Yay Olimpiya Oyunlarında Lionel Messinin də çıxış etməsini istəyir. 90plus.az xəbər verir ki, Yay Olimpiya Oyunlarının futbol yarışlarında ölkələrin U-23 milli komandaları mübarizə aparır. Əsasnaməyə görə, futbol üzrə hər milli komandanın yaşı 23-dən çox olan 3 oyunçunun xidmətindən yararlanmaq hüququ var. Maskerano isə məhz Messini komandasında görmək istəyir.  Mütəxəssis "TyC Sports"a verdiyi müsahibədə 36 yaşlı futbol əfsanəsi ilə danışıqlar apardıqlarını, lakin bunun asan olmadığını etiraf edib: " Mən Lionel ilə danışdım və biz ona dəvət göndərdik. Biz danışıqlara davam edəcəyik. O, "İnter Mayami" ilə mövsümə yeni başlayıb və bizim Yay Olimpiya Oyunlarına qədər hələ bir az vaxtımız var. Nəzərə almalıyıq ki, Messi bu yay Amerika kubokunda da oynayacaq. Bu, asan vəziyyət deyil”. Bu, Messinin Pekin 2008-də Argentina millisinin qızıl medal qazanmasından sonra ikinci Olimpiadada iştirakı ola bilər.