Sərbəst güləş üzrə Azərbaycan millisinin üzvü Georgi Meşvildişvili (125 kq) Bakıda Olimpiya təsnifat turnirində Paris-2024-ə vəsiqə qazanması barədə danışıb. 90plus.az xəbər verir ki, yarımfinalda Alen Xubulov (Bolqarıstan) üzərində inamlı qələbə qazanan 31 yaşlı idmançı azarkeş motivasiyasından danışıb: “Komanda, federasiya, məşqçi korpusu qarşısında məsuliyyətim var idi. Qələbə üçün əlimdən gələni etdim. Uğuruma görə, bütün məşqçi heyətinə təşəkkürümü bildirirəm. Federasiya da bizim üçün hər cür şəraiti yaratmışdı. Xüsusən də, azarkeşləri vurğulamalıyam. Azarkeşlərsiz bu uğur mümkün olmazdı”. G.Meşvildişvili Fransada keçiriləcək olimpiadaya çempionluq üçün yollanacağını söyləyib: “ Bütün rəqiblər yaxşıdır. Xüsusən də, Moldova idmançısını qeyd edərdim. Yarışa yüksək səviyyədə hazırlaşmaq lazımdır. Bütün idmançıların əsas arzusu olimpiya qızılını qazanmaqdır. Hamı bunun uğrunda döyüşəcək”. Qeyd : Azərbaycanın 5 sərbəst güləşçisi olimpiadaya lisenziya əldə edib. Meşvildişvili ilə yanaşı, Əliabbas Rzazadə (57 kq), Hacı Əliyev (65 kq), Turan Bayramov (74 kq) və Osman Nurmaqomedov (86) bunu bacarıblar.