Fizuli Məmmədovdan “Şamaxı” qələbəsinə şərh: “Bu, sırf mübarizə və xarakter oyunu idi”.
90plus.az xəbər verir ki, Azərbaycan Premyer Liqasının 28-ci turunda evdə “Şamaxı”nı 1:0 hesabı ilə məğlub edən Karvan-Yevlax klubunun baş məşqçisi Fizuli Məmmədov oyundan sonra komandasının çıxışını yüksək qiymətləndirib.
Mütəxəssis matçın çətinliyini əvvəlcədən gözlədiklərini bildirib və rəqibə xüsusi tərif verib:
“Çox çətin oyun olacağını əvvəlcədən bilirdik. “Şamaxı” çempionatın ən möhkəm və strukturlaşdırılmış komandalarından biridir. Meydanın hər zonasında sistemli oynayırlar.”
“Plan standart vəziyyətlərə görə qurulmuşdu”
Məmmədov rəqibin güclü tərəflərini analiz etdiklərini də qeyd edib:
“Xüsusilə standart vəziyyətlərdə təhlükəli olacaqlarını bilirdik və buna uyğun hazırlaşmışdıq.”
“Bu oyun döyüş idi”
Baş məşqçi qələbənin əsas açarını futbolçularının mübarizəsində görüb:
“Oyun çox gərgin keçdi. Uşaqlar tapşırıqları maksimum yerinə yetirdilər. Onlar bu gün əsl döyüşkənlik və xarakter göstərdilər.”
Onun sözlərinə görə, komandanın qələbəsi yalnız taktika yox, əzmkarlığın nəticəsidir:
“Verdikləri performansa görə hər bir futbolçuya təşəkkür edirəm. Bu, sırf mübarizə oyunuydu.”
“İndi növbəti matça fokuslanırıq”
Məmmədov qələbənin sevincinə baxmayaraq, diqqəti dərhal növbəti görüşə yönəltdiklərini bildirib:
“Bu nəticəni geridə qoyub dərhal növbəti oyuna hazırlaşmalıyıq. Bizim üçün hər matç eyni dərəcədə vacibdir.”
