Tomas Müllerli “Vankuver Uaytkaps” böhran içində: klubun gələcəyi sual altındadır.
90plus.az xəbər verir ki, "Vankuver Uaytkaps" meydanda uğurlu nəticələr göstərməsinə baxmayaraq, ciddi idarəetmə və maliyyə problemləri ilə üz-üzə qalıb.
Komanda 2025-ci il mövsümünü MLS-də ikinci pillədə başa vurub və finalda uduzaraq mövsümü ikinci yer sahibi kimi tamamlayıb. Hətta heyətdə təcrübəli ulduz Tomas Müller olsa belə, klubun ümumi vəziyyəti narahatedicidir - The Athletic.
Əsas problemlərdən biri maliyyə ilə bağlıdır. “Vankuver Uaytkaps” ev oyunlarında orta hesabla 20 min azarkeş toplasa da, bilet satışından əldə olunan gəlirin cəmi 12 faizini qazanır. Bu isə onları liqanın ən az gəlir əldə edən klubuna çevirir.
Bundan əlavə, klubun stadion icarə müqaviləsi ilin sonunda başa çatır və hələ də yeni razılaşma əldə olunmayıb. Daha da diqqətçəkən məqam isə yeni stadion layihəsinin ümumiyyətlə planlaşdırılmamasıdır.
Klubun gələcəyi ilə bağlı qeyri-müəyyənlik bununla da bitmir. “Vankuver Uaytkaps” 2024-cü ilin dekabrından satışa çıxarılıb və komandanın Las Vegas şəhərinə köçürülməsi ehtimalı müzakirə olunur. Bu ssenari azarkeşlərin ciddi etirazlarına səbəb olub.
Əgər bu baş verərsə, bu, MLS tarixində 2006-cı ildən sonra ilk klub relokasiyası olacaq.
