Misli Premyer Liqasının 17-ci turunda “Kəpəz” sensasiyaya imza ataraq “Qarabağ”ı 2:0 hesabı ilə məğlub edib. Qarşılaşmadan sonra Gəncə təmsilçisinin baş məşqçisi Azər Bağırov oyunu dəyərləndirib.
90plus.az xəbər verir ki, təcrübəli mütəxəssis ilk olaraq rəqib komandaya münasibət bildirib. O, “Qarabağ”ın Çempionlar Liqasındakı çıxışını xüsusi qeyd edərək Ağdam klubuna Avropa arenasında uğurlar arzulayıb. Bağırovun sözlərinə görə, rəqibin hansı heyətlə meydana çıxmasının önəmi yoxdur, çünki “Qarabağ” artıq Avropada ad qazanan yüksək səviyyəli klubdur. Baş məşqçi eyni zamanda öz futbolçularının meydandakı əzmkarlığından məmnun qaldığını gizlətməyib.
Azər Bağırov etiraf edib ki, oyundan əvvəl belə hesablı qələbə gözləmirdi. O, futbolçularını qarşılaşmaya psixoloji baxımdan necə köklədiyini də açıqlayıb:
“Komandaya inam aşılamağa çalışdım. Dedim ki, istək və mübarizə varsa, meydanda mümkünsüz heç nə yoxdur. Bu görüşə son şans kimi yanaşmağı tapşırdım. Uşaqlar dediklərimi yerinə yetirdilər, sona qədər vuruşdular və qollarını da vurdular. Kiminsə xoşuna gəlməsə belə, bu qələbə tam haqlıdır”.
Mütəxəssis qazanılan 3 xalın təsadüf olmadığını vurğulayıb və mümkün mükafat məsələsinə də toxunub. Onun sözlərinə görə, bu mövzu klub rəhbərliyinin səlahiyyətindədir, lakin futbolçuların əməyi dəyərincə qiymətləndirilməlidir.
