AFFA-nın prezidenti Rövnəq Abdullayev “Dalğa Arena”da yerləşən Milli Komandaların Məşq Mərkəzində Azərbaycan yığmasının futbolçuları ilə görüşüb. 90plus.az AFFA-nın rəsmi saytına istinadən xəbər verir ki, qurumun vitse-prezidenti Vaqif Sadıqov, İcraiyyə Komitəsinin üzvü İsgəndər Cavadov və baş katib Sərxan Hacıyevin iştirak etdiyi görüşdə AFFA prezidenti millinin oyunçularını Novruz bayramı münasibətilə təbrik edib, 2024-cü ildə Almaniyada təşkil olunacaq Avropa çempionatının seçmə mərhələ oyunlarında onlara uğurlar arzulayb. Baş məşqçi Canni De Byazi və komandanın kapitanı Emin Mahmudov AFFA rəhbərliyinə təşəkkürünü bildirib, qarşıdakı matçlarda uğurlu nəticə qazanmaq üçün komandanın tam gücü ilə səfərbər olacağını vurğulayıblar. Qeyd edək ki, AVRO-2024-ün seçmə mərhələsində Azərbaycan millisi martın 24-də Linz şəhərindəki “Raiffeisen Arena”da Avstriya, üç gün sonra isə Solna şəhərindəki “Friends Arena”da İsveç seçməsi ilə qarşılaşacaq.