“Real Madrid” Federiko Valverde və Orelyen Çuameni ilə bağlı yaşanan ciddi insidentdən sonra klub tarixinin ən gərgin dövrlərindən birini yaşayır.
Valverde və Çuameni klub tarixində ən böyük cərimə ilə üzləşəcəklər.
90plus.az xəbər verir ki, “Real Madrid” rəhbərliyi Valdebebasdakı məşq bazasında baş verən hadisələrə görə genişmiqyaslı cəzalar üzərində işləyir. Mənbə bu olayı artıq klub tarixinin ən ciddi insidentlərindən biri kimi qiymətləndirir - Onda Cero-dan jurnalist Alberto Pereyro.
Məlumata əsasən, Federiko Valverde və Orelyen Çuameninin idman baxımından da dərhal cəzalandırılması mümkündür. Klub hər iki futbolçunun 3-10 oyunluq diskvalifikasiya olunması variantını nəzərdən keçirir.
Bu qərar qəbul edilərsə, Alvaro Arbeloanın komandası mövsümün son hissəsində iki əsas futbolçusundan məhrum olacaq. Klub bununla daxili nizam-intizamın idman nəticələrindən daha üstün olduğunu göstərmək istəyir.
Bununla yanaşı, “Real Madrid” rəhbərliyi misli görünməmiş maliyyə cəriməsi tətbiq etməyə hazırlaşır. Bildirilir ki, futbolçuların illik ümumi maaşının 5 faizinə qədər cərimə nəzərdə tutulur.
Bu isə real rəqəmlərlə təxminən hər futbolçu üçün 500 min avro deməkdir. Mənbə bu məbləği “çox ağır cəza” kimi xarakterizə edib və klubun gələcək üçün nümunə yaratmaq istədiyini vurğulayıb.
Bütün bunlara baxmayaraq, “Real Madrid”in yay transfer dönəmində Valverde və Çuameni ilə yolları ayırmaq niyyətində olmadığı bildirilib. Klub rəhbərliyi sərt cəza tətbiq etməyə hazır olsa da, Madrid təmsilçisi hələ də hər iki futbolçunu komandanın gələcəyi üçün vacib fiqurlar hesab edir.
