Azərbaycan millisinə dəvət alan "Buriram Yunayted"in hücumçusu Ramil Şeydayev toplanış başa çatmamış yığmamızın düşərgəsini tərk edəcək. 90plus.az xəbər verir ki, o, Tailand klubunun Asiya Çempionlar Liqasında iştirakına görə bu xahişlə millimizin baş məşqçisi Canni De Byaziyə müraciət edib. İtaliyalı mütəxəssis isə onun istəyini müsbət qarşılayıb. Bu haqda AFFA-nın yaydığı məlumatda qeyd olunub. Beləliklə, Şeydayev sentyabrın 9-da Avro-2024-ün seçmə mərhələsində Belçika ilə Bakıda keçiriləcək oyundan sonra millini tərk edəcək. Yığmamız isə sentyabrın 12-də İordaniya ilə yoldaşlıq oyunu keçirəcək.