Azərbaycan Fransa səddini də aşdı, qrupu zirvədə tamamladı.

90plus.az xəbər verir ki, Slovakiyada təşkil olunan minifutbol üzrə Avropa çempionatında Azərbaycan millisi qrup mərhələsini maksimum nəticə ilə başa vurub.

F qrupundakı son oyununda Fransa ilə qarşılaşan yığmamız gərgin mübarizə şəraitində keçən görüşdən qalib ayrılıb. Beş qolun vurulduğu matçda Azərbaycan rəqibini 3:2 hesabı ilə məğlub edib.

Komandamızın qələbəsində Cəfər Cəfərov, Elvin Əlizadə və Ramiz Çovdarovun vurduğu qollar həlledici rol oynayıb.

Beləliklə, millimiz qrup mərhələsində keçirdiyi hər üç oyundan qalib ayrılaraq F qrupunun lideri kimi növbəti mərhələyə yüksəlib.

Azərbaycan yığması turnirdəki çıxışına Avstriya üzərində 1:0 hesablı qələbə ilə start vermişdi. Komandamız ikinci turda isə İtaliya millisini 3:0 hesabı ilə məğlub etmişdi.

Üç oyunda üç qələbə qazanan millimiz Avropa çempionatında çempionluq yolunda inamlı addımlamaqda davam edir.