"Yuventus” Alisson Bekkeri istəyir – braziliyalı qapıçı qərarını yayda verəcək.
90plus.az xəbər verir ki, “Yuventus” yay transfer pəncərəsi üçün əsas hədəflərindən birini müəyyənləşdirib. Turin klubu heyətinə yüksək səviyyəli qapıçı qatmaq istəyir və bu siyahıda əsas namizəd Alisson Bekker hesab olunur.
Lakin bu keçidin reallaşması o qədər də asan görünmür. Belə ki, “Liverpul” qapıçının müqaviləsini 2027-ci ilə qədər uzadıb və onu buraxmaq niyyətində deyil.
Bununla belə, yaxın həftələrdə həm Alissonun, həm də Mamardaşvilinin tərəfi ilə danışıqların aparılması planlaşdırılır. “Qırmızılar” gələcək qapıçı planlamasını dəqiqləşdirmək istəyir.
Məlumata əsasən, Alisson karyerasını yenidən İtaliyada davam etdirmək ideyasına müsbət yanaşır.
Xatırlatma: O, daha əvvəl “Roma”da çıxış edib. Bununla yanaşı, braziliyalı qolkiper “Liverpul”a hörmətlə yanaşır və yekun qərarı verməzdən əvvəl klubdakı gələcəyini diqqətlə qiymətləndirmək niyyətindədir.
Hazırda vəziyyət açıq qalır və qapıçı ilə bağlı son qərarın yay aylarında veriləcəyi gözlənilir.
