“Mingəçevir” tarix yazdı – “Qəbələ” ilə pley-offda qarşılaşacaq.

90plus.az xəbər verir ki, "Mingəçevir" Azərbaycan I Liqasının son turunda vacib qələbə qazanaraq Premyer Liqaya yüksəliş uğrunda pley-off mərhələsinə vəsiqə əldə edib.

27-ci tur çərçivəsində öz meydanında "Səbail" ilə üz-üzə gələn bölgə təmsilçisi rəqibini 4:1 hesabı ilə məğlub edib. Yaşar Məmmədzadə adına Mingəçevir şəhər stadionunun ehtiyat meydançasında keçirilən qarşılaşmada ev sahibləri üstün oyun nümayiş etdirərək həlledici üç xalı qazanıblar.

Bu nəticədən sonra xallarının sayını 51-ə çatdıran “Mingəçevir” turnir cədvəlində ikinci pilləyə yüksəlib. Beləliklə, komanda mövsümü ilk “iki”likdə başa vuraraq pley-off hüququ əldə edib.

Məğlubiyyətlə üzləşən “Səbail” isə 50 xalla üçüncü sıraya geriləyib və Premyer Liqaya dönüş şansını itirib.

Artıq pley-off mərhələsində “Mingəçevir”in rəqibi də bəllidir. I Liqanın gümüş medalçısı Misli Premyer Liqasını 11-ci yerdə tamamlayan Qəbələ ilə qarşılaşacaq.

Bu duel növbəti mövsüm elitada iştirak edəcək komandanın adına aydınlıq gətirəcək.