Azərbaycanın U-21 millisinin çalışdırıcısı Samir Əliyev Avropa çempionatının seçmə mərhələsində Ukraynaya 0:3 hesablı məğlubiyyəti şərh edib. 90plus.az  xəbər verir ki, Əliyev Ukrayna futbolunun həmişə öndə olduğunu bildirib: " Bu ölkədə hər zaman güclü futbolçular yetişib. Aşağı yaş qruplarından ibarət yığma komandaları hər zaman Avropa çempionatlarında iştirak edib və edirlər. Əbəs yerə qrupda bütün oyunlarını qələbə ilə başa vurmayıblar və təsadüfi deyil ki, birinci pillədə qərarlaşıblar". Mütəxəssis İngiltərəyə 1:5 hesablı məğlubiyyətdən sonra komandanı bu oyuna kökləməyin çətin olduğunu söyləyib:   " Bu matça həm psixoloji, həm də fiziki olaraq hazırlaşmaq çox çətin oldu. Nəriman Axundzadə real qol imkanından istifadə edə bilmədi. Hesab 0:2 olanda isə futbolçular dərk edirdilər ki, geridönüş etmək çətin görünür. Bu vəziyyətdə Xəyal Əliyev və Rüfət Abbasov kimi daha gənc futbolçuları meydana buraxdıq ki, ən azından ab-havanı hiss etsinlər".