Kaplanoviç: “Son saniyəyədək mübarizə apardıq və haqq etdiyimiz qələbəni qazandıq”.

90plus.az xəbər verir ki, "Sumqayıt"ın məşqçisi Veliçko Kaplanoviç Misli Premyer Liqasının 31-ci turunda "Araz-Naxçıvan" üzərində qazanılan 2:1 hesablı qələbədən sonra oyunu dəyərləndirib.

Təcrübəli mütəxəssis dramatik sonluqla yadda qalan qarşılaşmada komandasının göstərdiyi əzmkarlığı xüsusi vurğulayıb. Kaplanoviç futbolçuların son dəqiqələrə qədər oyundan qopmadığını bildirib.

“İlk növbədə futbolçularımı və bizi dəstəkləyən azarkeşləri təbrik edirəm. Komanda meydanda böyük istək nümayiş etdirdi. İlk hissədə planlaşdırdığımız oyunu sərgiləyə bildik. İkinci hissədə isə rəqib daha fəal görünürdü. Buna baxmayaraq, sona qədər inanırdıq və qələbə qolunu vurmağı bacardıq”, – deyə o qeyd edib.

Məşqçi ikinci yarıda oyunun nəzarətinin müəyyən qədər rəqibə keçməsinin səbəblərinə də toxunub. Onun sözlərinə görə, sadə ötürmə səhvləri komandaya problem yaradıb:

“‘Araz-Naxçıvan’ keyfiyyətli futbolçulara sahib olan güclü komandadır. Bizim əsas çətinliyimiz top itkiləri və uğursuz ötürmələr idi. Bu da rəqibin üstünlük qazanmasına şərait yaradırdı”.