Marko Silva “Benfika”nın yeni baş məşqçisi olur – rəsmi razılıq əldə edilib!
90plus.az xəbər verir ki, portuqaliyalı mütəxəssis Marko Silva karyerasını yenidən vətənində davam etdirəcək. Məlumata görə, 48 yaşlı baş məşqçi “Benfika” ilə tam razılığa gəlib və klubun yeni çalışdırıcısı olacaq.
Silva İngiltərə Premyer Liqasında “Fulhem”i çalışdırırdı və müqaviləsini başa vurduqdan sonra “Benfika”ya qoşulacaq. Onun Lissabon təmsilçisi ilə 2028-ci ilin iyununa qədər müqavilə imzalayacağı, sözləşmədə 2029-cu ilə qədər uzadılma opsiyasının da yer alacağı bildirilir. Mütəxəssisin daha yüksək hədəflərə fokuslanmaq üçün maaşında azalmaya da razı olduğu qeyd olunur.
Fabrisio Romanoya əsasən, Marko Silva ilə həm klub prezidenti Ruy Koşta, həm də idman direktoru Mario Branko maraqlanırdı və danışıqlar müsbət nəticələnib.
Silva son illərdə “Fulhem”də sabit komanda formalaşdıraraq diqqət çəkib. O, ilk mövsümündə komandanı Çempionşipdə çempion edib, daha sonra isə Premyer Liqada ardıcıl olaraq orta sıralarda – 10-cu, 13-cü və 11-ci yerlərdə başa vurub.
Buna baxmayaraq, mütəxəssisin yeni çağırış üçün hazır olduğu və “Fulhem”də daha böyük investisiya olmadan maksimum nəticəyə çatdığını düşündüyü bildirilir.
“Benfika” üçün bu təyinat vacib addım kimi dəyərləndirilir. Lissabon klubu 2022/23 mövsümündən bəri çempionluq qazana bilməsə də, ölkənin ən titullu komandası olaraq qalır. Son mövsümdə isə 11 heç-heçə ilə yadda qalan komanda çempionluğu “Portu”ya uduzaraq mövsümü 3-cü pillədə başa vurmuşdu.
Marko Silva üçün bu dönüş həm də Portuqaliya futboluna qayıdış deməkdir. O, son olaraq 2015-ci ildə “Sportinq”i çalışdırdıqdan sonra ölkə xaricində – “Olimpiakos” və İngiltərədə müxtəlif klublarda işləyib.
